Ufìtziu de sa limba sarda

Pubblicato il 18 febbraio 2022 • Cultura

Dae su mese de nadale de su 2021 at torradu a abèrrere s'ufìtziu de sa limba sarda. S'ufìtziu est a disponimentu de totu sas biddas de s'Unione pro consulèntzias, pro cumpartzire bideas e cuncordare a manos de pare atividades culturales e de promotzione linguìstica cunformas a cantu istabilidu in su progetu. Su progetu ''Barigadu in limba'' est istadu finantziadu a s'Unione de sos Comunes (art. 9 e 15 de sa Lege 482/1999; Lege Regionale 22/2018).
S'Ufìtziu est acasagiadu in su pranu terra de su Comunu de Fordongianus in bia Francesco Coco. Su servìtziu, afidadu a sa sotziedade Cooperativa L'altra cultura de Aristanis, at a èssere ativu fintzas a su 31 de nadale de su 2022.
S'ufìtziu est a disponimentu de totu sos tzitadinos, istudiantes, mastros de iscola, assòtzios culturales, consultas de giòvanos, bibliotecas e ludotecas de sos comunes de s'Unione, pro informatziones, aprofundamentos, dudas, curiosidades chi pertocant sa limba sarda e s'impreu suu in sos raportos cun s'Amministratzione Pùblica, pro consulèntzias bibliogràficas, sitogràficas, ortogràficas e grammaticales in contu de su sardu.
S'isportellu de sa limba sarda aberit su martis e sa giòbia a mangianu dae sas oto a sas duas (08.00/14.00) e sa giòbia sero dae sas duas e mesu a sas bator e mesu (14.30/16.30).
Pro faeddare cun sos operadores de s'isportellu si podet tzerriare a su 349.6025986 o iscrìere a s' indiritzu de posta eletrònica isportellu.limba.barigadu@gmail.com